“Оюу Толгой” ажилчдаа цомхтгож эхэллээ

Өнөөдөр өглөө “Оюу Толгой” ХХК-иас ажилчдынхаа тодорхой хэсгийг цомхтгож байгаа талаар мэдэгджээ. Үүний дагуу цомхтголд орсон ажилчиддаа мэдэгдэл хүргүүлсэн байна. Зарим эх сурвалжийн мэдээлснээр, тус компани цомхтгол хийх болсон шалтгаанаа дотоод зохион байгуулалтдаа өөрчлөлт оруулж, зардлаа хэмнэх, дэлхийн зах зээл дээр алт, зэсийн үнэ унасантай холбож тайлбарласан аж. Бид цомхтголын талаар тус компанийн Олон нийт, хэвлэл мэдээлэлтэй харилцах хэлстийн ажилтан С.Энхцэцэгтэй холбогдож тодрууллаа.

-Өнөөдөр “Оюу Толгой” компани 100 гаруй ажилтнаа цомхтгож буй мэдээлэл байна. Хэр бодитой мэдээлэл вэ?

-Өглөөнөөс цомхтголд орж буй ажилчиддаа мэдэгдэл хүргүүлж эхэлсэн. Яг одоогийн байдлаар хичнээн хүн цомхтголд орсон талаар нарийн мэдээлэл өгөх боломжгүй байна.

-“Оюу Толгой” компани эдийн засгийн хүндрэлд орсон учраас орон тооны нийт ажилчдынхаа 30 хувийг цомхтгоно гэж яригдаж байна?

-Энэ талаар одоогоор мэдэгдсэн зүйл алга байна.

-Ямар учраас ажилчдаа цомхтгож байгаа хэрэг вэ?

-Өнөөдөр манай компанийн хувьд маш хүнд өдөр болж байна. Эдийн засгийн сорилтыг даван туулах, зах зээлийн бодит нөхцөл байдалд дасан зохицох, ирээдүйд бий болох олон боломжийг алдахгүй байх зэргээс үүдэлтэй. Бодит нөхцөл байдлыг судалж үзсэний үндсэн дээр ажилчдаа цомхтголд оруулах нь зүйтэй юм байна гэсэн шийдвэрийг компанийн зүгээс гаргасан. Тэгээд ч уул уурхай нь эдийн засгийн “хямрал”-д их өртөмтгий салбар юм.

-Олон хүн ажилгүй болж байгаа таагүй мэдээлэл байна. Цомхтголд орж буй ажилчдаа эдийн засгийн нөхцөл байдал сайжирсан тохиолдолд эргүүлэн ажилд нь авах талаар ярилцаж байгаа юу?

-Цомхтголд орж буй ажилчин бүртэй компанийн зүгээс ганцаарчилсан уулзалт хийж байгаа. Мөн тэдгээр ажилчдаа өөр хэлтэс, тасаг руу шилжүүлэх асуудлыг судалж байна.