Гудамж төслөөс 2014 онд хэрэгжүүлэх зам барилгын ажил хийх уулзвар, замуудын байршил

Эдийн засгийн хөгжлийн яамнаас хэрэгжүүлж байгаа “Гудамж” төслийн хүрээнд Улаанбаатар хотод 2014 онд хэрэгжүүлэх зам барилгын ажлууд тавдугаар сараас эхэлсэн. Энэ онд тус төслийн хүрээнд Хан-Уул дүүрэг, Яармагийн гүүрнээс ТЭЦ3-ын баруун талаар Ажилчны гудамжтай нийлэх 1.5 км авто зам, Сүхбаатар дүүрэг, 100 айлын уулзварын өргөтгөл шинэчлэлийн ажил, Баянгол дүүрэг, Ахуйн үйлчилгээний уулзварын өргөтгөл шинэчлэлийн ажил, Сүхбаатар дүүрэг, “Цэцэг” төвийн уулзвараас урагш Сөүлийн гудамж, Баянгол зочид буудлын арын замтай холбох 0.45 км авто зам болон Баянзүрхийн товчооноос Туул голын хойд эрэг дагуу Улаанбаатар хотоос баруун болон хойд чиглэлийн аймгууд руу явах замын уулзвар хүртэл 33 км үргэлжлэх Туулын хурдны замын ажил зэрэг 10 гаруй уулзвар, замын өргөтгөл шинэчлэлийн ажлыг эхлүүлэх юм. Тиймээс зам барилгын ажилтай холбогдуулан Гудамж төслөөс холбооны шугам, эзэмшигч ашиглагч байгууллагуудыг зам барилгын ажил явуулах уулзвар, замуудын ойр орчимд байгаа өөрийн эзэмшлийн агаарын болон бусад кабель шугамыг хамгаалах, боломжтой бол шилжүүлэх талаар мэдээлэл солилцож, хамтран ажиллахыг сануулжээ.

Төслийн хүрээнд 2014 онд зам барилгын ажил хийх уулзвар, замуудын байршил:

1. Хан-Уул дүүрэг, Яармагийн гүүрнээс ТЭЦ3-ын баруун талаар Ажилчны гудамжтай нийлэх 1.5 км авто зам.

2. Сүхбаатар дүүрэг, 100 айлын уулзварын өргөтгөл шинэчлэлийн ажил.

3. Баянгол дүүрэг, Ахуйн үйлчилгээний уулзварын өргөтгөл шинэчлэлийн ажил.

4. Сүхбаатар дүүрэг, “Цэцэг” төвийн уулзвараас урагш Сөүлийн гудамж, Баянгол зочид буудлын
арын замтай холбох 0.45 км авто зам.

5. Сонгинохайрхан дүүрэг, “Монос”-ын уулзвараас Нисэх-Яармагийн уулзвар хүртэл 5.5 км авто замын өргөтгөл шинэчлэлийн ажил.

6. Сонгинохайрхан дүүрэг, “Өнөр” хорооллын арын замыг 21 дүгээр хорооллын замтай холбох /Москва хорооллын араар/ 1 км авто зам.

7. Сонгинохайрхан дүүрэг, “Өнөр” уулзвараас зүүн тийш үерийн далан дагуу 10 дугаар хорооллын уулзвар хүртэл 1.44 км авто зам.

8. Хан-Уул дүүрэг, Удирлагын академийн арын замыг “Жапан” тауны замтай холбох 0.74 км авто зам.

9. Баянзүрх дүүрэг, Шар хадны автобусны эцсийн буудлаас Улиастайн гүүртэй холбогдох 6.6 км авто зам.

10. Баянзүрхийн товчооноос Туул голын хойд эрэг дагуу Улаанбаатар хотоос баруун болон хойд чиглэлийн аймгууд руу явах замын уулзвар хүртэл 33 км үргэлжлэх Туулын хурдны зам.